Bale de neve

 'Ndì e na note
l'avea fiocà
e verso matina
'l s'à serenà.

per el gran fredo
de la stagion
le strade, le piasse,
l'era tuto 'n groston.

Montagne de neve
en dovuto sbailar,
fabriche e scole
i à dovuto serar.

Con siarpa e capelo,
vestido de giasso,
de neve anca quelo
i à fato 'n paiasso.

I brachi de boto
'n meso a la piassa
i sbàra al fantocio
i ride, i sganassa.

Tra burle e matade
ci tira e ci sbalia,
tra le contrade
se 'nvia na batalia;

                mi 'n parte, al securo,
                in zona neutrale,
                vardo e misuro
                'l fis-ciar de le bale                    

     
                Ma na bomba de giasso
                tirà da 'n cechin
                m'à fato seco,
                la m'à ciapà 'ndel copin

                         PLINIO PASINI    

Foto by Karen Vetro
(mia figlia)                                                                            
Facebook: http://it-it.facebook.com/KarenVetroPhotography
Flickr: http://www.flickr.com/photos/karenvetrophotography/